Frühecher – das isch immer chli ä schwierigi Ussag, weu wenn isch frühecher gsi? – I meinä so frühecher, woni no ir Oberstufä bi gsi. Nid so das Frühecher wo auti Lüt aubä meine we si drvo redä was aues angers u besser gsi isch. Äbä frühecher hani Badi öpis schlimms gfundä. Sonä Asammlig vo viunä haubbluttä Lüt, wo i völlig überfülltä Becki lut desume plantschä. I ha das aubä nid verstandä, wieso mä gärn id Badi geit zum dert när mit mega viune angernä desumä zliegä u si Körper z präsentierä.
Guet, zum einä het ds ou dran glägä, dass i zu derä zit chli Mühe mit mim Körper ha gha, weu irgendwelchi Übermönschä u Supermodels mir hei vorgläbt, dass i müess absurd dünn si zum schön si. U irgendwie hani när gar ke Lust gha mit mim unperfektä Körper dert i diä überfüllti Wiesä zliegä. Hüt dänk i, hätt i das nur mau chli meh gmacht, de hätt i gseh, dass diä meistä Mönschä keni perfektä Körper hei. Aber ja nu, das hani derfür itz nach em nä viertu Jahrhundert Läbenszit glehrt, wo gwüss nid ä sehr längi Zit isch, aber gnue um so einiges gloubä zverstah u erläbt zha.
U mit denä Jahr isch ou d Erkenntnis cho was so toll ar Badi isch. U ds chamä etz so verstah, dass i ou gärn mit aunä angerä ir überfülltä Badi umä liegä, mis Tüechli näbä andernä bis mä ke Wiesä meh gseht, u gärn im louwarmä Wasser umäplantschä, wo eim ständig frömdi Haar zwüschä dä Finger blibä hängä.
Aber es isch ä chli angersch, ums Badä geits gar nid so fest u dr Lärm vo däm Fleischmärit bruchi ou geng no nid.
Wär scho mau frühe am Morge, auso so am 8i, id Badi isch, wird viellech verstah was i meunä. D Sunnä isch scho fei ä chli ufgangä, d Luft aber geng no so chühel, dass sie erfrüschend isch. Um diä Zit hets no nid viu Lüt ir Badi. D Wiesä isch mönschäläär u no aus Wiesä sichtbar. Im Becki schwümmä nur diä autigsässnä Quartierbewohner*innä, wo hie jedä Morgä azträffä si. I sänkä dr Autersdurchschnitt dütlech, weu mini Generation isch dütlech no nid existänt so frühe am Morgä. Diä chömä ersch später wes so richtig heiss isch u mä ir Sunnä a sim Teint cha schaffe.
Nach em Länginä schümmä, lieg i de id Wiesä u lah mi Körper ir Sunnä la tröchnä. I ha mirs de doch nid la näh is Wasser zga, aber um diä Zit schiint mir z Wasser ou no chli suberer und glustiger – faus mä das vo chlordurchsetztem Wasser überhoupt cha sägä.
D Sunnä isch no nid so richtig heiss, aber gnue warm zum entspannt nomau chli zdösä ohni grad ä Sunnäbrand zbecho. U das mit em dösä funktioniert ou sehr guet, weu es isch abgseh vom Vogugezwitscher u glägentlechä Gspräch nid viu zghörä. Ussert si sigä mau wieder dr Rasä am mäihä, damit diä Massä när inä bienifreii Wiesä cheu liegä.
D Krönig vo däm Badimorgä isch de es Kaffi im Badibeizli. Das tönt etz chli ironisch, aber i meunä das im vouä ärnst. Es Kaffi und es guets Buech u när eifach Si. Z Si isch am schönstä. Dass mä eifach isch, u dass das guet isch. U weni grad nid so völlig ines Buech itoucht bi ds ig eh nümme mitbechumä woni bi, de losi dä Gspräch zue wo um mi umä stattfindä, u wunderä mi ab derä Exklusivität wo das Badibeizli und ja eigendlech ou diä ganzi Badi a somnä Morgä het.
Nid nur einisch hani beobachtet wie diä, wo schiinbar immer hie si, sech entrüstä über Personä wo us ihrerä Perspektivä (zmindst zu derä Tageszit) nid dahärä ghörä. D Badi sig am verluderä heissts de, we es paar Jugendlichi scho am Morgä frühe mit Böxli d Wiesä beschallä. Oder de wird gar d Polizei grüeft we einä verwirrt u äuä chli uf Drogä dür diä ganzi Badi louft, zwar niemer belästigt, aber dr allmorgendlech Friedä trüebt.
I denä Momäntä frag i mi de, was i hie eigendlech mach, dass das ja ganz u gar nid mini Philosophie isch und ig mit mirä Awäsäheit derä wissä, guetbürgerlechä, überalteretä Exklusivität nid o uno bipflichtä wot.
Aber derä frühemorgendlechä Usdünstig vo Exklusivität wohnt ou viu Inspiration bi fürs Schribä. Us settigä Momäntä chönntä ganzi Komödie u gsellschaftlechi Abhandlige entstah. Chönntä. Weu mir längts eifach es bitzeli dürber zschribä u dermit es Stück vo däm festzhaltä.
Z einzigä wo mä muess isch Ougä u Ohrä ufmachä, u de bechunnt mä scho aui möglechä Gschichtä mit vo drüfach Prothesenä u kabuttä Chneu, abgseitä Ferie u wär weli Wurst gärn het.
I denä Gschichtä cha mä sech de suuhlä, wie d Badegäst im louwarmä Becki. U das isch, ohni überromantisierä z weuä, dr Zouber vor Badi.
