Chürzlech bini am nä Garagetor verbigfahre wo es Schild isch dran ghanget mit dr Ufschrift «Aus halten». Auso eigendlech isch dert gstande «Ausfahrt frei halten», aber z «fahrt frei» isch so abkratzet gsi, ds mes chum meh het chönnä läsä. Drum isch dert gstande «Aus halten». U woni drüber ha nachedänkt si mir viu Gschichte übers Ushaute igfaue.
Dr Röbu, zum Bispiu, hautet sit Jahre us, ds är aus Chef vo sirä Firma immer ou no nach Fiirabä muess büglä. Ds sini Arbeit nid eifach nur sini Arbeit isch, sondern äbä sini Verantwortig. U das ds bedütet immer unger Druck u Stress z stah.
D Lisa hautet us, ds dr Kili ihrä immer wieder Hoffnig macht, das ds no öpis wird mit ihnä. Si bhautet ihm es Plätzli frei i ihrem Läbä und i ihrem Härz. Si cha nid loslah und hautet us, ds sä das viu Energie u Emotionä chostet.
D Anuschka hautet us, ds si mit ihrem Ussehä immer no nid zfriedä isch. Ds si ständig drmit beschäftigt isch, sich z optimierä. Schöner, dünner, sportlecher, attraktiver. Si vergisst drbi ds ihres Ussehä nüt dermit ztüä het öb si liebenswärt isch, öb angeri si gärn hei u öb si drzueghört.
Dr Dimi hautet us, ds är sirä Liedeschaft vom Schrüblä u Wärchä im eigetä Wärchchäuer nid cha nachegah. «Etz eifach es haubs Jahr Chopf abä u dürä u när hani de wieder meh zit», het är gmeint u derbi nid so glücklech usgseh.
Dr Abi hautet us, ds är hiä nomau ganz vorä muess afah. Ds är mit zäh Jahr jüngernä ir Lehr isch obwou är scho zäh Jahr Arbeitserfahrig het, wo hie aber nid giutet. Är hautet ds us, weu är wot hie blibe und sis eigetä Gäut verdiene.
D Andä hautet us, ds si sit Jahre dr ganz Huushaut u d Chinderbetreuig allei muess schmeisse. U gäut inähole muess si ou no. Si het glehrt starch zsi, ke schwächi z zeige. Drum ghörsch sä nie jammerä. Wenn sä fragsch wies ihrä göng, chunnt geng es «Es muess» zrügg.
D Rosa hautet us, ds si immer wi weniger vo dä Gspräch um sä umä mitbechunnt. Ds si nümme versteiht was öper seit, we die Person nid sehr lut u sehr dütlech redet. «Nei, ds bruch i nid, ds isch geng no gange», seit sie jedes mau wemä sä druf ufmerksam macht, ds es Hörgrät doch ä gueti Sach wär.
D Nicä hautet us, ds si immer wieder sehr truurig isch. Ds ihrä de z Läbä ke freud macht, aues dunku u chaut isch u si sech eifach unger dr Bettdechi versteckä wot. «Zum nä Psycholog? Nei, ds isch nur für Lüt wos würk schlächt geit», u dermit isch aubä z Thema vom Tisch.
D Mi hautet us, ds si Ufgrund vo ihrem Ussehä immer wieder belästigt wird. Si hautet ds us, weu si glehrt het, ds ihrä Körper nid ihrä ghört. Ds es normal isch, ds angri Teili vo ihrem Körper aaluegä, kommentierä, bewärtä u aalängä.
Dr Achi hautet us, ds är sech nid zueghörig fühelt. Dütsch chaner sehr guet, schwiizerdütsch versteit är o, är het ä Job u ä eigeti Wohnig. Är het aues wo fürnä «gueti Integration» verlangt wird. Integriert fühelt är sech glich nid. Aber wüu är nid zrügg i sini Heimat cha, hautet är us sech hie nid dähei zfühelä.
I chönnt no ewigs so wiiter mache. U du hättisch sicher ou no so Gschichte z verzellä.
I frage mi was mir dürä chopf wär gange we uf däm Schiud «fahrt frei» wär gstande. «Fahrt frei» isch ja ou chli z Gägäteil vo «Aushalten». We mir frei fahrä, de steit üs vieles offä. Mir cheu dr Wäg u z Tempo säuber wählä. Aber ds isch es Privileg wo nid aui hei. Viunä blibt nüt angers übrig, aus uszhautä. U ds git mir zdänkä.
Es git mr zdänkä. Weu vieli zviu ushaute. Diä eintä weu nä nüt angers übrig blibt u diä angerä weu si gloubä es gieng nid angersch. U es git mr zdänkä, ds diä eintä nid drüber redä u diä angerä nid ghört wärdä. U es git mr zdänkä, ds sowieso vieli nid zuelosä u ou überhoupt nüt würk wei ghörä. U es git mr z dänkä, ds mr eifach wägluegä u ignorierä ds aui wei u söttä ghört wärdä.